காதல் நல்லது.. காதல் கெட்டது..

காதல்,
விதையினை விருட்சமாக்கும்.
பயிரினைப் பஸ்பமாக்கும்.

காதல்,
பாலையில் சோலையாகும்.
சோலையில் சர்ப்பமாகும்.

காதல்,
களைப்புக்கு நீராகும்.
களிப்புக்கு நஞ்சாகும்.

காதல்,
வேகத்தை மூட்டும்.
விவேகத்தை மூழ்கடிக்கும்.

காதல்,
செல்வத்தில் அமிர்தமாகும்.
வறுமையில் அமிலமாகும்.

காதல்,
நெறிப்படுத்தும் அங்குசமாகும்.
குத்துப்பட்டால் சீழ் பிடிக்கும்.

காதல்,
மின்னலாய் ஒளி தரும்.
மின்சாரமாய் பலி இடும்.

காதல்,
மனதில் துடிப்பைக் கொடுக்கும்.
இதய துடிப்பை எடுக்கும்.

காதல்,
மோகத்தில் தென்றலாய் வருடும்.
சோகத்தில் புயலாய் நெருடும்.

காதல்,
கல்லிலே கடவுளைக் காட்டும்.
கடவுளில் கல்லைக் காட்டும்.

காதல்,
தெரியாத வினாக்களுக்கு விடையளிக்கும்.
தெரிந்த விடைகளை மறந்தே போகும்.
காதல் நல்லது.. காதல் கெட்டது..


பொருள்:
சர்ப்பம் - நாகம்
களிப்பு - மகிழ்ச்சி
அங்குசம் - யானையை அடக்க பயன்படும் கூர்மையான முனை கொண்ட கம்பு